ރާއްޖޭގެ ކަނޑުފަޅުގެ ހިސާބު ބެލެހެއްޓުމަށް ނުވަތަ "އޯޝަން އެކައުންޓްސް" އެކުލަވާލުމަށް މަގުޗާޓެއް ތިމާވެއްޓާ ބެހޭ މިނިސްޓްރީން އިއްޔެ އިފްތިތާހުކޮށްފި އެވެ.
އެ މަގުޗާޓު އިފްތިތާހުކޮށްދެއްވީ، ފްރާންސްގައި މިހާރު ކުރިއަށް ގެންދާ އދ. ގެ ތިން ވަނަ އޯޝަންސް ކޮންފަރެންސްގެ ހަވާސާގައި ރާއްޖެއިން ގްލޯބަލް އޯޝަންސް އެކައުންޓްސް ޕާޓްނާޝިޕާއެކު އިންތިޒާމުކުރި ސައިޑް އިވެންޓެއްގައި ތިމާވެއްޓާ ބެހޭ މިނިސްޓަރު ތޯރިގް އިބްރާހިމެވެ.
ތިމާވެއްޓާ ބެހޭ މިނިސްޓްރީން ނެރުނު ބަޔާނެއްގައި ބުނީ ފަސް އަހަރަށް އެކުލަވާލި އެ މަގުޗާޓް ބެހިގެންވަނީ މައިގަނޑު ތިން ލަނޑުދަނޑިއެއްގެ މައްޗަށް ކަމަށެވެ. އެއީ؛
• އޯޝަން އެކައުންޓްސްގެ މަސައްކަތް ކުރުމަށް ފުރަތަމަ މަރުހަލާގެ މަސައްކަތްތައް އަންނަ އަހަރުގެ ނިޔަލަށް ނިންމުން.
• 2028 ވަނަ އަހަރު ނިޔަލަށް، ރާއްޖޭގެ އެކި ހިސާބުތަކުގައި އޯޝަން އެކައުންޓްސް ޕައިލެޓްކޮށް، ގައުމީ ފެންވަރުގެ ނިޒާމެއް އެކުލަވާލުމުގެ މަސައްކަތް ނިންމުން.
• 2030 ވަނަ އަހަރުގެ ނިޔަލަށް، އޯޝަން އެކައުންޓްސްގެ ނިޒާމުން ލިބޭ މައުލޫމާތު ހުރިހާ ގިންތިއެއްގައި ތަރައްގީގެ ސިޔާސަތުތައް ކަނޑައެޅުމުގައި ބޭނުންކުރަން ފެށުން.
