ކުޑަ އިންޓްރެސްޓް ރޭޓެއްގައި ބޯހިޔާވަހިކަމަށް ލޯނު ދޫކުރާ "ހިޔާވެހި" ފައިނޭންސިން ސްކީމްގެ ދަށުން ލޯނު ދިނުމަށް ހައުސިން މިނިސްޓްރީން ބޭންކް އޮފް މޯލްޑިވްސް (ބީއެމްއެލް)އާއެކު އެއްބަސްވުމެއްގައި މިއަދު ސޮއިކޮށްފި އެވެ.
އެ އެއްބަސްވުމުގައި ސޮއިކުރީ ހައުސިން މިނިސްޓްރީގައި މިއަދު ހެނދުނު ބޭއްވި ރަސްމިއްޔާތެއްގަ އެވެ.
ހައުސިން މިނިސްޓްރީގެ ފަރާތުން އެ އެއްބަސްވުމުގައި ސޮއިކުރެއްވީ ހައުސިން މިނިސްޓަރު ޑރ. އަބްދުﷲ މުއްތަލިބެވެ. އަދި ބީއެމްއެލްގެ ފަރާތުން ސޮއިކުރެއްވީ ސީއީއޯ މުހައްމަދު ޝަރީފެވެ.
އެ ރަސްމިއްޔާތުގައި މުއްތަލިބް ވިދާޅުވީ މި ސްކީމަށް ފޯމު ހުށަހަޅާފައިވާ މީހުންގެ އަސާސީ ޝަރުތުތައް ހަމަވޭތޯ މިވަގުތު ބަލަމުން އަންނަ ކަމަށެވެ. އެއަށް ފަހު ފޯމުތައް އިވެލުއޭޓްކޮށް، ލޯނުގެ ކަންކަން ހަމަޖެއްސުމަށް ބީއެމްއެލަށް ފޮނުވާނެ ކަމަށް އޭނާ ވިދާޅުވި އެވެ.
ފޯމުތައް އިވެލުއޭޓްކުރުމުގެ މަސައްކަތް އަންނަ މަހު ބޭންކުތަކުން ފަށާނެ ކަމަށް މުއްތަލިބް ވިދާޅުވި އެވެ.
