ގަވާއިދާ ހިލާފަށް އުޅޭ ބިދޭސީން ހޯދުމަށް ގައުމީ ފެންވަރުގައި ބޮޑު އޮޕަރޭޝަނެއް މާދަމާ ފައްޓަން ނިންމާފައިވާކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހާމަ ކުރައްވައިފި އެވެ.
ރައީސް މުއިއްޒު މިކަން ހާމަ ކުރެއްވީ ފ. ނިލަންދޫ ރައްޔިތުންނާ ބައްދަލުކުރެއްވުމަށް ރޭ އެރަށުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ. މި އޮޕަރޭޝަނަކީ ރާއްޖޭގައި ގަވައިދާ ހިލާފަށް އުޅޭ ބިދޭސީން ހޯދުމަށް ކުރިއަށް ގެންދާ ހާއްސަ އޮޕަރޭޝަނެއްކަމަށް ރައީސް ވިދާޅުވި އެވެ.
ރައީސް މުއިއްޒު ވިދާޅުވީ، ޤަވާއިދާ ޚިލާފަށް އުޅޭ ބިދޭސީންގެ މައްސަލައަކީ މިހާރު ރާއްޖޭގައި ދިމާވެފައިވާ އެންމެ ބޮޑު އެއް މައްސަލަ ކަމަށެވެ. އަދި މިކަމުގެ ސަބަބުން ދިވެހިންނަށް ލިބެންޖެހޭ ފުރުސަތުތައް ހަނިވެފައިވާކަން ރައީސް ފާހަގަކުރެއްވިއެވެ.
”އެތައް ހަރުފަތެއް މައްޗަށް ޖައްސައި މާދަމައިން ފެށިގެން ނޭޝަން ވައިޑްކޮށް ރާއްޖޭގެ ހުރިހާ ރަށެއްގައި ޚާއްޞަކޮށް އާބާދީ ބޮޑެތި ރަށްތަކުގައި މިދެންނެވި ގޮތަށް ނުގަވައިދު ހިންގާ ވިޔަފާރިތައް ހޯދައި އެ ތަންތަން ވަގުތުން ބަންދުކޮށް އެ ފަރާތްތައް ރިޕޯޓުކުރުމުގެ ޚާއްޞަ އޮޕަރޭޝަނެއް މާދަމާ އެބަ ފަށަން،“ ރައީސް ވިދާޅުވި އެވެ.
މި އޮޕަރޭޝަންގެ މައިގަނޑު މަޤްސަދަކީ ދިވެހި ރައްޔިތުންނަށް ވިޔަފާރިކުރުމަށް އޮންނަ ޙައްޤު ފުރުޞަތުތައް އަނބުރާ ހޯދައިދިނުން ކަމަށް ރައީސް ވިދާޅުވި އެވެ. އަދި ނުގަވައިދުން އުޅޭ ބިދޭސީންނަށް ފުރުޞަތު ދޭ ދިވެހިންނަށް ވެސް ރައީސް ވަނީ އިންޒާރު ދެއްވާފަ އެވެ.
ރައީސް އިތުރަށް ވިދާޅުވީ ދިވެހި ރައްޔިތުން މިތިބީ ވަޒީފާގެ ފުރުޞަތުތަކަށް ބޭނުންވެފައި ކަމަށާއި، އެހެންކަމުން ނުގަވައިދުން އުޅޭ ބިދޭސީންނަށް ފުރުޞަތު ނުދިނުމަށް ދިވެހި ރައްޔިތުންނަށް ގޮވާލައްވާ ކަމަށެވެ.
