ޓޫރިޒަމް މިނިސްޓްރީން އާންމުކުރި އެންމެ ފަހުގެ ތަފާސްހިސާބުތަކުން ރާއްޖޭގެ ފަތުރުވެރިކަމުގެ ސިނާއަތަށް ލިބިފައިވާ ބޮޑު ކުރިއެރުންތަކެއް ހާމަވެއްޖެއެވެ.
މި އަހަރުގެ ފެށުނުއިރުއްސުރެ މިހާތަނަށް 1400 އަށް ވުރެ ގިނަ އެނދު ވަނީ އިތުރުކުރެވިފައެވެ. އަހަރު ފެށުނުއިރު ރާއްޖޭގެ އޮޕަރޭޝަނަލް ބެޑް ކެޕޭސިޓީގައި ޖުމްލަ 63,248 އެނދު ހުއްޓެވެ. މީގެ ތެރޭގައި 42,547 ރިސޯޓު އެނދާއި، 15,621 ގެސްޓް ހައުސް އެނދާއި، 2,028 ހޮޓާ އެނދާއި، 3,052 ސަފާރީ އެނދު ހިމެނެއެވެ. ނަމަވެސް މިހާރުގެ ތަފާސްހިސާބުތަކަށް ބަލާއިރު، އޮޕަރޭޝަނަލް ބެޑް ކެޕޭސިޓީ ވަނީ 64,555 އެނދަށް އަރާފައެވެ. މި އަދަދުތަކުގެ ތެރޭގައި 43,247 ރިސޯޓު އެނދާއި، 15,626 ގެސްޓް ހައުސް އެނދާއި، 2,484 ހޮޓާ އެނދާއި، 3,229 ސަފާރީ އެނދު ހިމެނެއެވެ. މިއީ އަހަރު ފެށުނުއިރު ހުރި އަދަދުތަކާ އަޅާބަލާއިރު 1490 އެނދު އިތުރުވެފައިވާ އަދަދެކެވެ.
ރާއްޖޭގައި ފަތުރުވެރިންނަށް ޚިދުމަތް ދިނުމަށް ރަޖިސްޓްރީކޮށްފައިވާ ޖުމްލަ ބެޑް ކެޕޭސިޓީއަކީ 66,807 އެނދެވެ.
އޮޕަރޭޝަނަށް ގެނެސްފައިވާ ޓޫރިސްޓު ފެސިލިޓީތަކުގެ އަދަދުތަކަށް ބަލާއިރު، މި މަހުގެ 28 ވަނަ ދުވަހުގެ ނިޔަލަށް ޖުމްލަ 1,265 ޓޫރިސްޓު ފެސިލިޓީއެއް ވަނީ ފަތުރުވެރިންނަށް ހުޅުވާލާފައެވެ. މީގެ ތެރޭގައި 174 ރިސޯޓު، 924 ގެސްޓުހައުސް، 161 ސަފާރީ، އަދި 16 ހޮޓާ ހިމެނެއެވެ. އިއްޔެގެ ނިޔަލަށް މި އަދަދު ވަނީ 1,277 ޓޫރިސްޓު ފެސިލިޓީއަށް އަރާފައެވެ.
ފަތުރުވެރިންގެ އަދަދުވެސް ވަނީ ހިތްހަމަޖެހޭ މިންވަރަކަށް އިތުރުވެފައެވެ. މިއަހަރުގެ މިހާތަނަށް ރާއްޖެއަށް ޖުމްލަ 1,625,852 ފަތުރުވެރިން ޒިޔާރަތްކޮށްފައިވެއެވެ. މި އަދަދު ފާއިތުވި އަހަރު ރާއްޖެއަށް އައި ފަތުރުވެރިންނަށްވުރެ 9.7 އިންސައްތަ އިތުރުވެފައިވާކަން ފާހަގަކޮށްލެވެއެވެ. މި ހިސާބުތަކުން ދައްކަނީ ރާއްޖޭގެ ފަތުރުވެރިކަމުގެ ސިނާއަތް ދެމެހެއްޓެނިވި ގޮތެއްގައި ކުރިއަރަމުންދާ ކަމާއި، އިތުރު ފަތުރުވެރިންނަށް ޚިދުމަތް ދިނުމަށް ތައްޔާރުވަމުންދާ ކަމެވެ.
