ރައީސް ޑރ. މުހައްމަދު މުއިއްޒުގެ ވައުދާ އެއްގޮތަށް ރާއްޖޭގެ ހުރިހާ އަތޮޅެއްގައި އައިޑީ ކާޑު ހެއްދުމުގެ ޚިދުމަތް ޤާއިމްކޮށް ނިންމައިފިއެވެ.
މި ޚިދުމަތް އެންމެފަހުން ފެށިފައިވަނީ ވ. އަތޮޅުގައެވެ.
ވ. އަތޮޅުގެ ވެރިކަން ކުރާ ރަށް ފެލިދޫގައި މި ޚިދުމަތް ފައްޓަވައިދެއްވީ ފިނޭންސް މިނިސްޓަރު މޫސާ ޒަމީރެވެ. މިއީ ރައީސް ޑރ. މުޙައްމަދު މުޢިއްޒު ވ. އަތޮޅުގެ ރަށްރަށަށް ކުރައްވަމުންގެންދަވާ ދަތުރުފުޅުގެ ތެރެއިން ފެށިގެންދިޔަ ޚިދުމަތެކެވެ.
އައިޑީ ކާޑު ހެއްދުމުގައި ދިމާވެފައިވާ މައްސަލަތައް ހައްލުކުރުމަށް ސަރުކާރުން ވަނީ އިސްކަމެއް ދީފައެވެ. އެގޮތުން އޮންލައިންކޮށް އެދުމުގެ ނިޒާމު އުވާލައި، ރަށު ކައުންސިލްތައް މެދުވެރިކޮށް އައިޑީ ކާޑު ހައްދަން އެދެވޭ ގޮތަށް "ނާރެސް" ޕޯޓަލް ވަނީ ތަޢާރަފުކޮށްފައެވެ.
ރައީސް ޑރ. މުޙައްމަދު މުޢިއްޒު މިދިޔަ އަހަރުގެ ޖުމްހޫރީ ދުވަހުގެ ރަސްމީ ޖަލްސާގައި ވިދާޅުވެފައިވަނީ މިއަހަރުގެ ނިޔަލަށް ހުރިހާ އަތޮޅަކުން އައިޑީ ކާޑާއި ޕާސްޕޯޓްގެ ޚިދުމަތް ލިބޭނެ މަގު ފަހިކޮށްދެއްވާނެ ކަމަށެވެ. މިހާރު އެ ވަޢުދު ވަނީ ފުރިހަމަކުރައްވާފައެވެ.
އައިޑީ ކާޑުގެ ޚިދުމަތް ރާއްޖޭގައި ފުރަތަމަ ފެށިފައިވަނީ 1984 ވަނަ އަހަރުގެ މެއި މަހުގެ ފުރަތަމަ ދުވަހުއެވެ. 2003 ވަނަ އަހަރު މި ޚިދުމަތް ކޮމްޕިއުޓަރައިޒްކޮށް، ޕްލާސްޓިކް ކާޑަށް ބަދަލުކުރެވުނެވެ. އޭރު 174 ކަލެކްޓިން ސެންޓަރު ޤާއިމުކޮށް ޚިދުމަތް ދެމުން ގެންދިޔައެވެ.
