މީޑިއާ އަދި ބްރޯޑްކާސްޓިން ކޮމިޝަނުގެ ދާއިމީ މެންބަރުން ހަމަޖެހެންދެން، އެ ކޮމިޝަން ހިންގުމަށް ސިވިލް ސަރވިސް ކޮމިޝަނުން މިއަދު ފަސް މެންބަރުންގެ ކޮމިޓީއެއް އެކުލަވާލައިފިއެވެ.
މިދިޔަ އަންގާރަ ދުވަހު ރައްޔިތުންގެ މަޖިލީހުން ފާސްކޮށް، ބުރާސްފަތި ދުވަހު ރައީސުލްޖުމްހޫރިއްޔާ ތަސްދީގު ކުރެއްވި މީޑިއާ އަދި ބްރޯޑްކާސްޓިން ރެގިއުލޭޝަން ގާނޫނުގެ ދަށުން، އިންތިގާލީ މަރުހަލާ ކުރިއަށް ގެންދިއުމަށް ސިވިލް ސަރވިސް ކޮމިޝަނުން ވަނީ އެކި މިނިސްޓްރީތަކުގެ އިސް މަގާމުތަކުގައި ތިއްބެވި ފަސް ބޭފުޅުން ހޮވާފައެވެ. މީގެ ތެރޭގައި ހިމެނެނީ؛
ސްޕޯޓްސް މިނިސްޓްރީގެ އަލީ ޒަކީ،
ސިޓީސް މިނިސްޓްރީގެ އަހުމަދު މައުސޫމް،
އިސްލާމިކް މިނިސްޓްރީގެ އާމިނަތު ނަސީރު،
އިކޮނޮމިކް މިނިސްޓްރީގެ އާމިނަތު ޝާހިދާ
އަދި ޔޫތު މިނިސްޓްރީގެ އިމާދު މުހައްމަދު
މީގެތެރެއިން އިމާދު ފިޔަވައި އެހެން ބޭފުޅުންނަކީ ޑިރެކްޓަ ޖެނެރަލުންނެވެ. އިމާދު އަކީ ޗީފް ކޯޕަރޭޓް އެގްޒެކެޓިވް އެކެވެ.
ގާނޫނު ބުނާ ގޮތުން މި ވަގުތީ ކޮމިޓީއަށް ކޮމިޝަނުގެ އިދާރީ މަސައްކަތްތަކާއި، މައްސަލަތައް ބަލައިގަތުމާއި، މީޑިއާތައް ރަޖިސްޓަރީ ކުރުމުގެ މަސައްކަތްތައް ކުރެވޭނެއެވެ. ނަމަވެސް، ކުރީގެ ބްރޯޑްކާސްޓިން ކޮމިޝަނާއި މީޑިއާ ކައުންސިލުން ނުނިމި ހުރި މައްސަލަތައް ބެލުމާއި ކޮމިޝަނަށް އަލަށް ހުށަހެޅޭ މައްސަލަތައް ބެލުމުގެ ބާރެއް ކޮމިޓީއަކަށް ލިބިގެނެއް ނުވެއެވެ. ދާއިމީ ކޮމިޝަން އެކުލަވާލެވެންދެން މި ކޮމެޓީ ދެމިއޮންނާނެއެވެ.
ދާއިމީ ކޮމިޝަނުގައި ހިމެނޭނީ ހަތް މެންބަރުންނެވެ. މީގެ ތެރެއިން ތިން މެންބަރުން އައްޔަންކުރާނީ ރައްޔިތުންގެ މަޖިލީހުން ކަމަށާއި، ހަތަރު މެންބަރުން ހޮވާނީ މީޑިއާތަކުގެ މެދުގައި ނެގޭ ސިއްރު ވޯޓަކުން ކަމަށް ގާނޫނުގައި ބަޔާންކޮށްފައިވެއެވެ. މި ކޮމިޝަނުގެ ދާއިމީ މެންބަރުން 30 ދުވަހުގެ ތެރޭގައި އައްޔަންކުރަންޖެހޭނެއެވެ.
މީޑިއާ ކޮމިޝަންގެ ބިލް ފާސްކޮށް ތަސްދީގު ކުރީ ބައެއް ނޫސްވެރިންގެ ކަންބޮޑުވުންތައް ހުއްޓައެވެ. ނަމަވެސް ބިލް ފާސްކުރީ އެންމެ ބޮޑަށް ކަންބޮޑުވުން އުފެދުނު މާއްދާތައް ކަމަށްވާ ވަކިވަކި ނޫސްވެރިން ޖޫރިމަނާ ކުރުމާއި، ކޯޓުން ގޮތެއް ނުނިންމަނީސް މީޑިއާތަކުގެ ލައިސަންސް ބާތިލް ކުރެވޭ ގޮތައް އޮތް މާއްދާތައް އުނިކުރުމަށްފަހުއެވެ.
