އިންޑިއާގެ އުއްތަރަ ޕްރަދޭޝްގެ ޖަލައުން (އޮރައި) ގައި، އާ އަހަރުގެ ތަހުނިޔާ އަނބިމީހާ ނުކިޔުމުގެ ސަބަބުން ފުލުހަކު އަމިއްލައަށް މަރުވާން މަސައްކަތްކޮށްފިއެވެ.
ބްރަހަމްޖީތު ނަމަކަށް ކިޔާ މި ކޮންސްޓަބަލް، އޭނާގެ އަނބިމީހާއާ މިކަމާ ގުޅިގެން ހޫނު ބަހުސެއް ކުރުމަށް ފަހު، ސަރުކާރުން ދީފައިވާ ރަސްމީ ބޯހިޔާވަހިކަން ދޫކޮށް ވަލުތެރެއަށް ގޮސްފައިވެއެވެ.
އޭނާ ވަނީ ފަހުން އަނބިމީހާ އަށް ފޯނުން ގުޅައި، އޭނާ ޒަހަރު ބޮއެފައިވާ ކަމަށް ބުނެ ފޯނު ނިއްވާލާފައެވެ.
މި މަޢުލޫމާތު ލިބުމާއެކު ފުލުހުންގެ އިދާރާގެ ތެރޭގައި ބޮޑު ކަންބޮޑުވުމެއް އުފެދުނެވެ. ސާވިއަލެންސް ޓީމުގެ އެހީތެރިކަމާއެކު އޭނާ އޮތް ތަން ހޯދުމަށް ކުރި މަސައްކަތުން، އޭނާ ހޭނެތިފައި އޮއްވާ ފެނުނީ ވަލުތެރެއިންނެވެ.
ފުލުހުން ވަނީ ވަގުތުން އޭނާ މެޑިކަލް ކޮލެޖަށް ގެންގޮސް ފަރުވާ ދޭން ފަށާފައެވެ. ފަހުގެ ރިޕޯޓްތައް ބުނާ ގޮތުން ފަރުވާއަށް ފަހު މިހާރު އޭނާގެ ހާލަތު އަންނަނީ ރަނގަޅު ވަމުންނެވެ.
