ހަނގުރާމަ ހުއްޓާލައި ސުލްހަވެރިވުމަށް އެމެރިކާއިން ހުށަހަޅާފައިވާ ހުށަހެޅުން ދިރާސާ ކުރަމުންދާ ކަމަށާއި ނަމަވެސް އެމެރިކާއާއެކު ސީދާ މަޝްވަރާތަކެއް ނުކުރާނެ ކަމަށް އީރާނުން ބުނެފިއެވެ.
އީރާނުގެ ހާރިޖީ ވަޒީރު އައްބާސް އަރަގްޗީ ވިދާޅުވީ، ގަލްފް ހަނގުރާމަ ނިމުމަކަށް ގެނައުމަށް އެމެރިކާއިން ހުށަހަޅާފައިވާ ހުށަހެޅުންތައް ދިރާސާކުރަމުންދާ ކަމަށެވެ.
ދައުލަތުގެ ޓީވީ މެދުވެރިކޮށް ދެއްވި ބަޔާނެއްގައި އޭނާ ކަށަވަރުކޮށްދެއްވި ގޮތުގައި، މެދުވެރިން މެދުވެރިކޮށް ދެ ގައުމުގެ ދެމެދުގައި މެސެޖުތައް ބަދަލުކުރެވެމުންދެ އެވެ.
ނަމަވެސް، މެދުވެރިން މެދުވެރިކޮށް ކުރެވޭ މުއާމަލާތްތަކަކީ އެމެރިކާއާ އެކު ކުރެވޭ ސީދާ މަޝްވަރާއެއް ނޫން ކަމަށް އޭނާ ބާރުއަޅުއްވައި ވިދާޅުވި އެވެ. އަދި މެދުވެރިން މެދުވެރިކޮށް ލިބިފައިވާ ހުށަހެޅުންތައް އީރާނުގެ އިސް ލީޑަޝިޕާ ހިއްސާކޮށްފައިވާ ކަމަށާއި، ބޭނުންވެއްޖެ ހިނދެއްގައި އެކަމާ ގުޅޭ ގޮތުން ރަސްމީ ނިންމުމެއް އިއުލާނުކުރާނެ ކަމަށް ވެސް އޭނާ ވިދާޅުވި އެވެ.
ސަރަހައްދީ އޮފިޝަލިން ބުނާ ގޮތުގައި، އެމެރިކާ އާއި އިޒްރޭލާ އެކު ކުރެވޭ ހަނގުރާމަ ހުއްޓާލުމުގެ އެއްވެސް އެއްބަސްވުމެއްގައި ލުބުނާން ވެސް ހިމަނަންޖެހޭނެ ކަމަށް އީރާނުން ވަނީ ޝަރުތުކޮށްފަ އެވެ.
މިކަމާ ގުޅޭ ގޮތުން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، އީރާނުގެ ވެރިން އެއްބަސްވުމަކަށް އަންނަން ބޭނުންވި ނަމަވެސް، އެކަން ފާޅުގައި ހާމަކުރަން ފަސްޖެހެނީ ކަމަށެވެ.
-ސައްވީސް
